Kapau ʻoku maʻu ʻe hoʻo tokotaha ngaue tokoní ʻa e COVID-19, ko e potungāue tokoni ki he faingataʻaʻia fakaesinó ʻoku nau fatongia'aki hono kumi ha fetongi.
ʻI he ngaahi meʻa ʻe niʻihi, ʻe lava pe ke nau fai ha ngaahi tokoni mahuʻinga lolotonga ia ʻoku fakaakeake ai hoʻo tokotaha ngāue tokoni angamaheni. ʻE vakai'i atu hoʻo kautaha tokoní fekauʻaki mo ha faʻahinga liliu.
Kapau ʻoku ke fiemaʻu ke poupouʻi koe ʻe ha memipa ʻo e familí pe kaungameʻá, aleaʻi ʻeni mo hoʻo kautaha tokoni ki he faingataʻaʻia fakaesino.
Kapau ʻoku ke faʻa maʻu ha tokoni mei ha mēmipa ʻo e familí pe ha kaungāmeʻa, pe 'oku ke fakangāue'i fakataimi haʻo kau tokoni fakafoʻituitui, faʻu ha palani talifaki ki ha tokoni kehe telia naʻa nau maʻu ʻa e COVID-19.
ʻE lava ke kau ʻi he ngaahi meʻa ke fili mei aí:
- ha mēmipa ʻe taha ʻo e fāmilí pe kaungāmeʻa ʻokú ne tokangaʻi koe ʻi he vaha'a taimi ko ʻení
- ko ha tokotaha tauhi totongi 'oku fokotu'utu'u 'o fakafou ʻi ha kautaha tokoni
- fetuʻutaki ki hoʻomou tafaʻaki ki he Fakafuofuaʻi ʻo e Ngaahi Fiemaʻu Fakalotofonua ki he Fokootu'utu'u 'o e Ngāue Tokoní (NASC). Kapau te ke maʻu ha tokoni fakapaʻanga ki he faingataʻaʻia fakaesino, te nau fakahoko koe ki ha kautaha tokoni ki he kau faingataʻaʻia fakaesino.
Kapau ʻoku ke nofo ʻi he ʻapi tatau mo hoʻo tauhí, pea ʻoku nau sai feʻunga ke hokohoko atu ho tokangaʻí, te nau lava ʻo fakahoko ia. Te nau fiemaʻu ha naunau ke pule'i 'o e pipihí 'aki ha ngaahi naunau totonu mo e me'angāue malu fakatāutaha.
Kapau te ke maʻu ha poupou ʻi ho ʻapí, ʻoku mahuʻinga ke ʻi ai haʻo palani tokoni. ʻOku totonu ke kau heni hoʻo fakamatala mahuʻinga ki ho'o moʻui leleí mo e ngaahi founga tauhi angamahení.
Kapau ʻe ʻikai ke sai hoʻo tokotaha tauhi angamahení pea ʻoku ke fiemaʻu ke tokotaha tauhi fakatuʻupakē, ʻe lava ke vahevahe ʻa e palani ko ʻeni mo e tokotaha tauhi foʻoú. ʻOku ʻuhinga ʻeni ʻe lava ke hokohoko atu hono tokangaekina mo tauhi malu koé 'i ha founga malu.
ʻE lava ke tokoni atu hoʻo kautaha tokoni faingataʻaʻia fakaesinó ki hono faʻu ha palani. Te ke lava foki ʻo fakaʻaongaʻi ʻa e fanga ki'i palani tokangaekina 'oku 'atā atu 'i he uepisaiti Carers New Zealand.
ʻOku ʻi ai ha ngaahi meʻa ʻe niʻihi ke fakakaukau'i, fakatefito ki he COVID-19:
- malava 'o matu'uakiʻi e faitoʻó
- malava 'o matu'uakiʻi e ngaahi hui he me'ahuhú, mo e alā meʻa pehē
- malava 'o kātakiʻi e ngaahi me'a'ufi'ufi matá mo e ongo tiupi mānava ki he ihú
- ngaahi tu'utu'uni ki he kau ngāué/ngāue tauhí.
Kapau ʻoku ke fiemaʻu ha tokoni fakavavevave pea ʻoku ʻikai maʻu hoʻo tokotaha ngāue tokoni pe tauhi, te ke lava ʻo telefoni ki he laine hangatonu COVID-19 ki hono tokonia ʻo e kau faingataʻaʻia fakaesinó ʻi he 0800 11 12 13. Pe te ke lava ʻo text kiate kinautolu ʻi he 8988.
ʻE lava 'eni ke hoko kapau:
- 'oku ʻikai ke 'atā hoʻo tokotaha ngāue tokoní pea he ʻikai ke ne lava ʻo fai ʻa e poupou mahuʻinga ʻokú ke fiemaʻú
- ʻoku ʻikai ké ke lava ʻo ma'u 'a e potungāue 'oku nau fa'a tokangaekina ho'o tauhí
- ʻoku ʻikai ha taha ʻe ʻatā ke ne fakahoko ʻa e tokoni ʻoku ke fiemaʻu.
ʻOku lava ke maʻu atu e ngāue tokoní ʻi he houa ʻe 24 he ʻaho, 'i he ʻaho ʻe 7 he uike. ʻI he vahaʻa ʻo e 8am ki he 8pm ʻe tali ʻe ha taha ʻoku taukei pe ʻilo ki he faingataʻaʻia fakaesinó ʻa e telefoní mo fakafuofuaʻi e fiemaʻu fakavavevave ho tūkungá mo fai ha faleʻi pe tokoni. Hili ʻa e 8pm, ʻe tali ʻa e ngaahi telefoní ʻe ha mēmipa kuo akoʻi ʻo e timi Healthline.
ʻE ngāue fakataha ʻa e senitā tali telefoní mo koe ke fakapapauʻi ʻa e meʻa ʻoku fiemaʻu ke hoko, ʻa e tūkunga fakavavevave ho fiema'ú pe ʻoku fiemaʻu ha ngaahi tokoni fakafaitoʻo mo e ngaahi ngāue tokoni fakavavevave.
Hangē ko e angamahení, kapau ʻoku ʻi ai ha meʻa ala tu'u fakatu'utāmaki ki ho'o moʻuí pe 'i 'api, telefoni leva ki he 111 he taimi pe ko iá.