ʻI hoʻo fakaakeake mei he COVID-19, te ke ala fakatokanga'i hoʻo helaʻiá vave ange pe 'ikai mānava lelei. ʻOku angamaheni ʻaki ʻeni hili 'a e puké.
ʻOku totonu ke faingofua ange hoʻo foki ki hoʻo ngaahi ʻekitivitī angamahení. Fakapapauʻi ʻokú ke:
- maʻu ha mohe lelei
- kai lelei
- mālōlō 'okapau ʻokú ke fiemaʻu
- fakaakeake māmālie.
Kapau ʻoku ʻi ai ha meʻa ʻoku ke hohaʻa ki ai, ʻoku totonu ké ke talanoa ki hoʻo toketā pe polofesinale ki he moʻuileleí.
ʻOku faʻa fakamafola ʻa e COVID-19 ʻi he fetuʻutaki vaofi mo ha taha kuo pihia ʻi he taimi ʻoku nau tale pe sneeze ai. Neongo ʻoku hāhāmolofia, ka te ke lava foki ʻo pihia kapau te ke ala ki ha meʻa pe fukahi me'a kuo ma'unimá 'e he vailasí, pea ke ala leva ai ki ho ngutú, ihú pe ongo fo'imatá.
ʻE lava ke moʻui ʻa e vailasí 'i he ngaahi fukahi me'á ʻi ha taimi fakangatangata. Ka ʻoku ʻi ai ha milemila pelepelengesi ʻi tuʻa ʻoku faingofua ai ke tamateʻi ʻi hono fakamaʻa lelei mo fufulu 'aki e kemikale fufulú.
ʻI he taimi 'oku ʻi fale ai ha tokotaha kuo fakapapauʻi kuo ma'u 'e he COVID-19 i he houa ʻe 24 kuo hilí, ʻoku ngalingali ʻe nofo ʻa e vailasi ʻi he ngaahi fukahi me'á. ʻOku totonu ke fakamaʻa mo fufulu 'aki e kemikale tāmate siemú ʻa e ngaahi fukahi me'a kotoa pē.
'i he ʻaho ʻe 28 pe siʻi ange talu mei ha pihia 'o puke kimuʻa
Kapau te ke toe maʻu ʻa e ngaahi fakaʻilonga puke COVID-19 pea ko e ʻaho ʻeni ʻe 28 pe siʻi ange talu mei ha'o pihia kimuʻa (mei ha taimi naʻa ke sivi ola positivi pe ho ʻuluaki maʻu ha ngaahi fakaʻilonga puke) pea:
ʻoku si'isi'i ho'o tuʻu lavea ngofua, ʻoku ʻikai fiemaʻu ké ke toe fai ha sivi ʻe taha — nofo pe ʻi ʻapi ʻo fakaakeake ai, kae ʻoua kuo ʻosi ha houa ʻe 24 mei he ʻikai ke toe ʻi ai haʻo ngaahi fakaʻilonga puké
ʻoku ʻi ai haʻo mahaki tauhi pe ha ngaahi fakaʻilonga COVID-19 ʻoku fakaʻau ke kovi ange, ʻoku totonu ké ke kumi faleʻi mei ha tokotaha mataotao tauhi moʻui lelei pe Healthline ʻi he 0800 358 5453.
'i he ʻaho ʻe 29 pe lahi ange talu mei ha pihia 'o puke kimuʻa
Kapau ʻoku ke toe maʻu ha ngaahi fakaʻilonga COVID-19 pea kuo ʻosi ha ʻaho ʻe 29 pe lahi ange talu mei ha pihia kimuʻa, ʻoku totonu ké ke toe fai ha sivi RAT. Kapau ʻoku ola positivi, kuo pau ké ke fakamavaheʻi koe pea muimui ki he faleʻi tatau ki hoʻo ʻuluaki puke.
Kapau naʻa ke maʻu ʻa e COVID-19 ʻi loto he ʻaho ʻe 28 kuo hilí, pea kuo sivi positivi ha taha 'i ho'omou ʻapí, ʻoku ʻikai fiemaʻu ia ke lau koe ia ko ha Tokoaha Fetuʻutaki Vāofi Faka'api pea ʻoku ʻikai fiemaʻu ké ke sivi.
Kapau kuo lava ha ʻaho ʻeni ʻe 29 pe loloa ange talu mei hoʻo puke he COVID-19 pea sivi ola positivi ha taha ʻi ho'omou 'apí, pea 'e fiema'u leva ia ké ke sivi fakaʻaho ʻi ha ʻaho ʻe 5.
ʻOku fakamatalaʻi ʻe he COVID lōlōa ʻa e ngaahi fakaʻilonga puke ʻoku hokohoko atu pe fakatupulaki hili ʻa e ngaahi ʻuluaki fakaʻilonga COVID-19. ʻOku faʻa lōlōa ange ʻeni ʻi he uike ʻe 12 hili ha fuofua pihia 'a ha taha.
Ko e tokolahi taha ʻo e kakai ʻoku nau puke he COVID-19 'oku nau fakaakeake mei he ngaahi fakaʻilonga nounou mo e ngaahi fakaʻilonga puké ʻi loto ʻi he uike ʻe 2 ki he 4. Pea ʻoku totonu ke nau foki ki he ngaahi ʻekitiviti kotoa pe naʻa nau fai kimuʻa ʻi he COVID-19 ʻi ha uike ʻe 12. Neongo ia, ʻoku lipooti ʻe ha kakai ʻe niʻihi ha ngaahi fakaʻilonga puke kehekehe ʻo fakalaka atu ʻi he taimi angamaheni ʻo e fakaakeaké.
ʻE lava ke tolonga ʻa e ngaahi fakaʻilonga ʻo e COVID lōlōa ʻi ha ngaahi uike pe 'i ha ngaahi māhina. ʻE lava ke kau ai ʻa e:
- tāvaivaia 'aupito
- nounou e mānava
- tale
- mamahi e monga
- ha'iha'isia e fatafatá
- mamahi e fatafatá
- 'ikai kei tonu e fakakaukaú, 'ikai kei lava fakakaukau lelei pe ʻkakapu e ʻutó'
- 'ikai kei malava 'o mohe
- mohokohoka mo e hangē ku tui 'aki ha hui tuitui
- ninimo
- mamahi e hokohokotanga huí
- mamahi ʻa e uouá.
Ke maʻu ha tokoni ki hono tokangaʻi mo hono faitoʻo ʻo e COVID lōlōá, kumi tokoni mei hoʻo toketā pe timi ki he moʻuilelei. ʻOku fakapaʻanga kakato ʻa e tokangaekina 'o e mo'ui lelei mei he COVID-19 ʻo aʻu ki ha uike ʻe 6 mei he ʻuluaki ʻaho ʻo hoʻo ngaahi fakaʻilonga puké pe ko e ʻaho ʻoku ke sivi ola positivi aí, ko fē pe 'oku mu'a maí.
Te ke lava ʻo maʻu ha fakamatala lahi ange fekauʻaki mo e COVID lōlōá, kau ai ʻa e ngaahi fakaʻilonga puke ʻoku angamaheni ʻaki hono lipooti ʻi he uepisaiti ʻo e Potungāue Mo'uí:
Tatau ai pē pe naʻa ke maʻu ʻa e COVID-19 pe huhu maluʻi, ʻoku kei fiemaʻu pe ké ke tauhi e ngaahi ʻulungaanga ʻoku fakatupu mo'ui lelei. ʻOku malava pe ké ke toe maʻu ʻa e COVID-19.
ʻOku ʻikai ʻomi ʻe he COVID-19 ʻa e tuʻunga tatau ʻo e ngaahi malu’í ʻo hangē ko hono ma’u e he huhu maluʻí. ʻOku mau toe ʻiloʻi foki ʻoku faka'au ke holo 'a e maluʻi mei he huhu malu'i tefitó ʻi ha vahaʻa taimi.
Koeʻuhí ke māʻolunga e tuʻunga malu’i hoʻo sinó, ma’u e fakamuimui taha ‘o ho’o huhu maluʻí — kau ai ho’o ‘ū huhu fakalahi. Te ne fakasi’isi’i ange ho’o malava ‘o puke lahi mei COVID-19 ‘o a’u ki he tokoto falemahakí.
ʻOku totonu ké ke tatali ʻi ha māhina ʻe 3 hili ha'o sivi ola positi kimuʻa pea toki maʻu ha huhu maluʻi COVID-19.
